Comparte este artículo
Digg
Del.icio.us
Googlize this
Facebook
Exportar a PDF
Imprimir
E-mail
A literatura é un dos piares sobre os que se constrúe Cultugal, o fogar da cultura galega. Nesta cuarta edición, a Feira das Industrias Culturais contará, ademais das máis de 50 actividades centradas no mundo do libro incluídas no seu programa oficial, co seu propio relato literario, unha novela colaborativa creada en directo polo escritor e xornalista Camilo Franco xunto co público que asista á feira baixo o título Queres ser un personaxe de novela?
Canto máis crúa é a realidade, máis queremos ser personaxes de novela. É difícil porque os novelistas cando contratan personaxes prefiren espías, soldados, arcebispos ou xente con algunha relación co Códice Calixtino. Pero unha feira está para darlle volta ás cousas e mentres dure o Culturgal calquera pode ser un personaxe de novela. Pode escoller o papel que quere asumir nunha historia que, como case todas, comeza cunha crise e cun intento de asasinato. Non hai requisitos: só falar uns minutos co escritor e contarlle como lle gustaría aparecer e que opina da historia que que estará en marcha e que se irá completando segundo se vain sumando personaxes e avance a feira. A historia irá avanzando en vivo e en directo e poderá seguirse desde a mesma feira ou desde www.camilofranco.eu
Camilo Franco traslada o seu despacho de escritor “en vivo e en directo” ao Salón da feira durante tres días, desde primeira hora da mañá ata as 21h. O Salón é un cuarto confortable e amplo no que se sucederán as presentacións das últimas novidades editoriais como Onde mercan os Larpeiros e Criaturas, que contarán coa presenza de coñecidos personaxes da TVG; a primeira novela gráfica de Xosé Tomás, Nómades; as dúas novelas de fantasía xuvenil de Elena Gallego Dragal I e Dragal II; o Ninguén de Fran Alonso; o Poñente de Pere Tobaruela; a colección de Cociña infantil e familar; a Guía de Libélulas de Galicia e a Guía didáctica de instrumentos galegos; ou o volume colectivo sobre o 15M A praza é nosa, coordinado por Marcos Pérez Pena, entre moitos outros.
Un ano máis, as Conversas de Salón entre escritores e xornalistas serán un dos pratos fortes da Feira. Pasarán polo salón de Culturgal, entre outros, Manuel Rivas e José Luis Cuerda, Domingo Villar, Xulia Alonso, María Xosé Queizán, Carlos Callón, Antón Riveiro Coello, Mario Regueira e Jacobo F. Serrano, Antonio Piñeiro, Brais Rodríguez e Sergio Covelo do Colectivo Polaqia, novos autores de novela negra como Xosé Manuel García López e Francisco Varela Losada, Uxía ou Emilio Alonso e Víctor de las Heras. Con eles falarán sobre a literatura e sobre a vida catro xornalistas galegos de referencia: Ana Romaní, Manuel Jabois, Xesús Fraga e Teresa Cuíñas. Manuel Rivas, Domingo Villar, Xulia Alonso e María Xosé Queizán aproveitarán, ademais, para tomar un Café con lectores e lectoras dos seus libros, en encontros organizados por distintos colectivos de difusión e promoción da lectura.
No Cuarto dos Nenos tamén haberá unha importante presenza de propostas literarias ao longo dos tres días que dure a feira. Varios contatontos e obradoiros para aprender a apreciar a literatura en todas as súas vertentes e unha morea de divertidas presentación pensadas para os máis pequenos, como o Contatrás de Berrobambán e edicións Positivas; O meu gato é poeta de Fran Alonso e Xurxo Souto ou Vou ter un irmán de María Solar e Xosé Tomás e para os non tan pequenos, como o xogo de rol ao vivo Mortos de ningures, de Pereledi e Andrés Meixide; os “Megatoxos” e A chave da Atlántida de Anxo Fariña; ou A lenda de Cuaima e Mohan de Xan Egia.
E fóra da feira...
Os Poetas da Hostia venderán a súa alma o venres 2 ás 23h30 no Pequeño Karma nunha subasta na que o público poderá escoller de entre tres poetas a aquel polo que desexa poxar despois de escoitalos recitar. Un recital poético con música ao vivo e moito humor no que o que o poxador gañador leva en realidade non é ao poeta en vivo, senón un obxecto poético realizado pola artista María Longa baseado nun texto de cada un dos poetas participantes subastados, que representa a súa alma.
Finalmente, o domingo 4, terá lugar o primeiro Xantar Literario de Culturgal. O Restaurante Rúas cociña as receitas que Pepe Cáccamo, Fina Casalderrey, Xabier P. Docampo e Xesús Fraga expuxeron en libros recentes: Cociñando ao pé da letra (Editorial Galaxia) e 50 recetas con moras (Alvarellos). Os autores porán o seu toque na receita e acompañarán aos comensais nunha comida para falar de gastronomía, literatura e outras exquisiteces. O menú estará composto pola tortilla segundo receita de Pepe Cáccamo, a empanada de millo de croques de Fina Casalderrey, o peixe sapo en prebe de abelás e viño albariño especialidade de Xabier P. Docampo e unha sobremesa elaborada con froitos silvestres segundo as indicacións de Xesús Fraga. O prezo por comensal é de 30 € e pódese reservar oco no mail contidos(at)culturgal.com. Só quedan 10 prazas.
http://culturgal.com/mapa_feira.php?espazo=3
Máis información sobre Culturgal
A Feira das Industrias Culturais está organizada pola Asociación Culturgal, unha entidade da que forman parte as asociacións profesionais máis representativas do sector: Asociación Galega de Editores (AGE), Asociación Galega de Empresas de Artes Escénicas (Escena Galega), Asociación Galega de Empresas Musicais (AGEM), Asociación Galega de Produtoras Fonográficas (Agaphono), Empresas Galegas Adicadas a Internet e ás Novas Tecnoloxías (Eganet) e Asociación Galega de Produtoras Independentes (Agapi). Culturgal 2011 conta co patrocinio da Axencia Galega das Industrias Culturais (AGADIC), do Concello de Pontevedra, da Secretaría Xeral de Política Lingüística e do Ministerio de Cultura do Goberno de España.
