Comparte este artículo
Digg
Del.icio.us
Googlize this
Facebook
Exportar a PDF
Imprimir
E-mail
O conselleiro do Medio Rural, Samuel Juárez, visitou este fin de semana o Pazo de Baión, situado no municipio pontevedrés de Vilanova de Arousa, para coñecer in situ os traballos da vendima nesta finca, propiedade das adegas Condes de Albarei, integrada na denominación de orixe Rías Baixas.
Nesta visita, o titular de Medio Rural reiterou o compromiso da Xunta co sector do viño, que –segundo explicou– se materializa de xeito concreto en accións como as diferentes liñas de axudas que xestiona a Consellería para a promoción, a comercialización ou os plans de reestruturación e reconversión da viña. Tamén, engadiu o conselleiro, no impulso á Investigación, o Desenvolvemento e a innovación (I+D+i), con iniciativas entre as que salienta o proxecto Winetech (integrado no programa comunitario Interreg IV-B), que busca fomentar a innovación e a transferencia tecnolóxica.
Juárez lembrou así mesmo que o Goberno Galego liderou a protección das castes autóctonas galegas (e nomeadamente o albariño) en toda España, no que se refire á etiquetaxe de viños sen denominación de orixe, e está a facilitar ao sector o cumprimento da normativa comunitaria sobre transporte de produtos vinícolas a través dun decreto específico sobre a materia, que entrou recentemente en vigor.
O titular de Medio Rural destacou ademais o fomento do enoturismo (do que Pazo Baión é unha mostra senlleira), mediante a posta en marcha de diferentes rutas do viño nas denominacións de orixe da Comunidade Autónoma, no ámbito da cooperación transfronteiriza entre Galicia e o Norte de Portugal.
Vendima de 2011 en Rías Baixas
Neste acto, o conselleiro do Medio Rural puxo de manifesto que as previsión para a colleita de 2011 na denominación de orixe Rías Baixas –coma no resto das zonas de produción de Galicia– son especialmente favorables, tanto no que se refire á cantidade como á calidade de viño.
No exercicio de 2010 colleitáronse nesta D.O. máis de 31 millóns de quilos de uva, cunha produción de viño cualificado que superou os 160.000 hectolitros e un valor económico estimado de máis de 96 millóns de euros.
Apoio ao proxecto de Pazo Baión
O Pazo de Baión e a súa finca foi noutrora un dos símbolos do problema do narcotráfico en Galicia, ata que no verán de 2008 pasou a ser propiedade de Condes de Albarei. Esta adega beneficiouse de varias axudas xestionadas por Medio Rural para apoiar investimentos relacionados coa transformación e comercialización de produtos agrarios, cofinanciadas por fondos comunitarios Feader, así como para a promoción e a mellora da comercialización.
Ademais, a través do Grupo de Desenvolvemento Rural (GDR) 21-Salnés, no ano 2010 foi subvencionada a creación dunha tenda de exposición e venda nestas instalacións. Estas axudas dos GDR as coordina a Consellería, a través da Axencia Galega de Desenvolvemento Rural (Agader). En total, sumando as anualidades de 2009 e 2010, recibiu un total de 1.131.634 euros.
Deste total, no que atinxe ás axudas para transformación e comercialización, na convocatoria de 2009 esta empresa beneficiouse de 675.340 euros en concepto de axuda para a remodelación da antiga adega existente neste Pazo e a súa utilización produtiva. Outra axuda xestionada por Medio Rural, dentro deste mesmo apartado, permitiulle á empresa beneficiarse dunha nova achega de 156.394 euros (na convocatoria de 2010) para realizar diferentes melloras tecnolóxicas adicionais na mesma adega.
Canto á liña de axudas para promoción e mellora da comercialización, Condes de Albarei recibiu dúas axudas (nas convocatorias de 2009 e de 2010) por un importe total de 49.900 euros. Estes fondos destináronse a diversas actuacións, tales como a realización de catálogos promocionais, páxina web, deseño de produtos, presenza en feiras sectoriais e labores comerciais.
A estas axudas hai que sumar a recibida por Condes de Albarei a través do GDR 21- Salnés no ano 2010 para a creación dunha tenda de exposición e venda, para o cal acondicionouse o patio interior, o acceso peonil e a planta baixa da nave Sur. Nesta última creáronse catro zonas diferenciadas: almacén, sala de exposicións e ventas, sala de proxeccións e aseos e o correspondente mobiliario e equipamento. O importe da axuda ascendeu a 250.000 euros.
Proxecto vitivinícola
A partires da adquisición do Pazo de Baión por parte de Condes de Albarei, esta empresa desenvolveu un proxecto vitivinícola, enoturístico e social nesta emblemática leira, de máis de 30 hectáreas de superficie, que posúe o maior viñedo da subzona do Salnés (22 ha), dentro da D.O. Rías Baixas. Na colleita de 2010 comercializou un total de 80.000 botellas do albariño Pazo Baión. O recinto do Pazo converteuse nun centro de enoturismo dentro dun proxecto que se completa con programas sociais de loita contra a droga e de reinserción socio-laboral de ex-toxicómanos.
